Монгол Улсын төсөв:
- Шилэн дансны нэгдсэн цахим систем – shilendans.gov.mn
- Төрийн худалдан авах ажиллагааны цахим систем – tender.gov.mn
- Ил тод, нээлттэй төсөв (Иргэний төсөв) – iltod.mof.gov.mn
- Улсын төсвийн хөрөнгө оруулалт – publicinvestment.gov.mn
- Төсвийн хөрөнгө оруулалтын удирдлагын цахим систем (PIMIS) – pimis.publicinvestment.gov.mn
- Монгол Улсын Засгийн газрын гадаад зээл, тусламжийн удирдлагын мэдээллийн систем (ODAMIS) – odamis.mof.gov.mn
- Төрийн худалдан авах ажиллагааны газар -spa.gov.mn (Зарим нэг хуучин тендерийн урилга, үр дүн)
- Төрийн өмчийн бодлого, зохицуулалтын газар – pcsp.gov.mn (Дуудлага худалдаа гэх мэт)
- Орон нутгийн хөгжлийн сангийн цахим сайт – tusuv-oronnutag.mof.gov.mn (хуучин)
- Орон нутгийн хөгжлийн сангийн цахим сайт – onhs.mof.gov.mn (шинэ)
- Шилэн ажиллагаа – shilen.gov.mn
- Нээлттэй өгөгдлийн нэгдсэн портал – https://opendata.gov.mn/
- Монгол Улсын Засгийн газар – mongolia.gov.mn
- Төрийн байгууллагуудын нэгдсэн цахим хуудас – gov.mn/mn
- Яам, агентлаг, төсвийн байгууллага, төрийн өмчит болон төрийн өмчит компаниуд, төсвийн байгууллагуудын цахим хуудсууд
- Үндэсний аудитын газрын сайт – audit.mn
- Эрх зүйн мэдээллийн нэгдсэн систем – legalinfo.mn
Нийслэл Улаанбаатар хотын төсөв:
- Нийслэлийн Иргэдийн төлөөлөгчдийн хурлын цахим сайт – khural.ulaanbaatar.mn
- Улаанбаатар хот – ulaanbaatar.mn
- Нийслэлийн Засаг даргын тамгын газар – zdtg.ulaanbaatar.mn
- Улаанбаатар хотын худалдан авах ажиллагааны газар – ub-procurement.mn
- Улаанбаатар хотын бонд – ubbond.bdsec.mn
- Нийслэлийн эрх зүйн мэдээллийн нэгдсэн сан – ublegal.ulaanbaatar.mn
- Нийслэлийн харъяа байгууллагуудын цахим хуудсууд
- Нийслэлийн дүүргүүдийн цахим хуудсууд
Шилэн дансны нэгдсэн цахим систем
Нэвтрэх: shilendans.gov.mn
Энэ бол иргэд, олон нийт, татвар төлөгч, судлаач болон хэвлэл мэдээллийн ажилтнуудын хувьд хамгийн их хандаж өргөн ашигладаг төрийн мэдээллийн платформ юм.
Монгол Улсын төрийн болон төрийн оролцоотойгоор өрнөж байгаа төсөв, санхүүгийн үйл явцыг байгууллагуудаар ангилан олон нийтэд зориулан тасралтгүй ил тод, нээлттэй болгож байх зорилготой нэгдсэн цахим сайт юм. Үүнд 1. Монгол улсын төрийн болон захиргааны төв байгууллагууд (Монгол Улсын Ерөнхийлөгчийн тамгын газар, УИХ, түүнээс томилогддог болон шүүх засаглалын байгууллага, Монгол Улсын Шадар сайд, яам, агентлаг, хороо, зөвлөл гэх мэт), 2. Орон нутгийн буюу аймаг, нийслэл, сум, дүүргийн нутгийн өөрөө удирдах ёсны болон захиргааны байгууллагууд, 3. Төсвийн байгууллага (сургууль цэцэрлэг гэх мэт), 4. Төрийн ба орон нутгийн өмчит ба тэдгээрийн оролцоотой, өөрөөр хэлбэл хяналтын багц ба түүнээс дээш хувьцааг нь төр, орон нутаг болон тэдгээрийн нэгдмэл сонирхолтой этгээд эзэмшдэг компани, 5. Улс, орон нутгийн төсвийн хөрөнгөөр хөрөнгө оруулалт, төсөл, хөтөлбөр, арга хэмжээ, ажил, үйлчилгээ гүйцэтгэж байгаа аж ахуйн нэгж, байгууллага 6. Олон нийтийн өмчтэй гэж тодорхойлдог МҮОНРТ, 7. Төрийн чиг үүрэгт хамаарах ажил, үйлчилгээг хууль тогтоомж, гэрээний үндсэн дээр гүйцэтгэгч, 8. Төрийн санхүүжилт авч байгаа нам, эвслүүд тус тус хамаарна. Олон улсын санхүүжилттэй төсөл хөтөлбөр, Засгийн газрын тусгай сангууд ч багтаж байгаа юм. Тэд Монгол Улсын Сангийн яамнаас гаргасан аргачлал, ангиллын дагуу мэдээллээ сар сараар байршуулах үүрэгтэй.
Шилэн дансны цахим систем нь 2015 оноос ажиллаж эхэлсэн ба 2023 оноос шинэ хувилбарт шилжээд байна. Хэрэглэгчид тухайн байгууллага, төсөл хөтөлбөрийн нэрийг яг мэдэх боломжгүй учраас хайхад хүндрэл учирдаг.
Өнгөрсөн хугацааны туршлагаас үзэхэд иргэд, түүний дотор бид дараах гурван төрлийн мэдээллийг хайдаг. Үүнд, “Төсөв/гүйцэтгэл” цэснээс “Цалингийн зардлаас бусад таван сая төгрөгөөс дээш үнийн дүн бүхий зарлагын мөнгөн гүйлгээ. “Хөрөнгө оруулалт/тендер, худалдан авалт” цэснээс “Таван сая төгрөгөөс дээш үнийн дүн бүхий худалдан авсан бараа, ажил үйлчилгээний нэр, санхүүжилтийн хэмжээ, нийлүүлэгчийн нэр, хаяг”, “Бусад” цэснээс “Бонд, зээл, өрийн бичиг, баталгаа, түүнтэй адилтгах санхүүгийн бусад хэрэгсэл, төр хувийн хэвшлийн түншлэлийн гэрээ, концесс, төсөв, өмч, хөрөнгө, мөнгө зарцуулах, өр, авлага үүсгэсэн аливаа шийдвэр болно.
| Бид Шилэн дансны нэгдсэн цахим системийн өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг Энэ тухай хуудсанд зочилно уу |
Ил тод, нээлттэй төсөв
Энэ бол Монгол Улсын төсвийн мэдээллийг иргэд, олон нийтэд зориулан бэлтгэж хүргэдэг цахим сайт юм. Ийм учраас “Иргэдийн төсөв”, “Иргэдийн оролцоотой ил тод нээлттэй төсөв” гэсэн хэд хэдэн давхар нэртэй бөгөөд “Тус цахим хуудас нь төсвийн мэдээллийн албан ёсны нээлттэй эх сурвалж юм” юм гэсэн тодотголтой. Хэд хэдэн удаа, хамгийн сүүлд шинэчлэгдсэн 2024 оны хувилбар ажиллаж байна.
“Иргэдийн төсөв”, “Иргэдийн оролцоо”, “Иргэдийн төсөвтэй танилцах”, “Төсвийн тухай мэдлэгээ тэлэх”, “Иргэдийн боловсрол”, “Иргэдийн оролцоо” гэх мэт олон нийтэд хандсан агуулгатай цэсүүдээс төсвийн холбогдолтой нэлээд мэдээлэл авах боломжтой. Гэхдээ ерөнхий статистик, дүн, танилцуулга зонхилж үүнийгээ янз бүрээр нэрлэж давхардуулсан байна. Бас мэдээллийн шуурхай байдал тааруу. Хэрвээ иргэд өөрсдийн ажилладаг салбар, эсвэл амьдардаг нийслэл, аймаг, сум, дүүргийн төсөв, хөрөнгө оруулалтын мэдээлэл авья гэвэл тодорхой мэдээлэл маш бага.
Монгол Улсын Сангийн яамнаас 2018 оноос эхлэн “Иргэдийн төсөв” нэртэй товхимлийг жил бүр бэлтгэн гаргаж ирсэн билээ. Энэ нь тухайн жилийн төсвийн төсөл ба батлагдсан төсвийн тоо мэдээллийг энгийн ойлгомжтой хэлбэрээр, зураглал, инфографикийг өргөнөөр ашиглаж дэлгэн харуулсан байх авч ерөнхий танилцуулга, сурталчилгаанаас хэтэрдэггүй. Тэгэхээр төсвийн үйл явцад хяналт тавих, иргэдийн оролцоог хангах зэрэгт ач холбогдол багатай.
“Төсвийн мэдээлэл татах” цэсний ихэнх мэдээлэл бас л ач холбогдол багатай бөгөөд 2025 оны батлагдсан төсөв одоо хүртэл нийтлэгдээгүй байна.
Дэлхийн банкнаас санаачилж Монгол улс нэгдэж орсон “Boost: Нээлттэй төсвийн портал” мэдээллийн сангийн хөтөлбөр цэсийг энд оруулжээ. Үүний дагуу Монгол Улсын төсвийн 2010 оноос хойшхи орлого зарлагын мэдээллийг нээлттэй байршуулах учиртай. Хэрвээ хэрэгжүүлж чадвал чухал боловч одоогоор дөнгөж эхлэлийн байдалтай, цөөн тооны хагас дутуу мэдээлэлтэйгээр удаж байна.
| Бид iltod.mof.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг Энэ тухай хуудсанд зочилно уу |
Улсын төсвийн хөрөнгө оруулалт
Энэ бол Монгол Улсын төсвийн хөрөнгө оруулалтын үйл явцыг хамгийн нээлттэй болгож байгаа хамгийн том талбар юм.
Улсын төсөв.
“Төслийн санхүүжилт” цэсэнд нийт 205 санхүүжилтийн хүсэлтийг жагсаасан байна. Хүсэлт тус бүрийн явц, одоогийн төлөв, гэрээ зэрэг мэдээллийг багтаасан тул тухайн төсөл, хөтөлбөрийн талаар мэдэж авахад тустай байж болно. Гэхдээ 205 гэдэг бол мэдээж хангалттай тоо биш юм.
Хөрөнгө оруулалтын төсөл, арга хэмжээг эдийн засгийн ангиллаар, орон нутгаар, төсвийн ерөнхийлөн захирагчдын багцаар, бас хатуу хучилттай авто зам, сургууль, цэцэрлэг гэх мэт объектын төрлөөр харуулах цэсүүдтэй боловч одоогоор ерөнхий статистик мэдээлэл зонхилсон.
Бусад цэсүүд, тухайлбал,2025 оны 2-р сарын байдлаар “Онцлох” гэсэн цэсэнд ердөө гурван төслийн танилцуулга орсон бол “Төсөл, арга хэмжээ”, “Ашиглалтад орсон төсөл”, “Иргэдийн оролцоо” зэрэг цэсүүд хоосон байна.
Гадаадын зээл тусламж:
Нийт 649 гадаадын зээл тусламжийн төсөл, арга хэмжээ, ашиглалтад орсон 1259 төсөл, арга хэмжээний явцын мэдээллийг байршуулжээ.
Нийслэлийн төсөв:
Одоогоор ямар нэгэн мэдээлэл байхгүй
Орон нутгийн төсөв:
Энд ганцхан төслийн мэдээлэл оржээ.
Эрдэнэт үйлдвэр:
Мэдээлэл байхгүй
Концесс:
Энд хоёр төслийн мэдээлэл орсон байна.
Харин “Төсөв 2025” гэсэн нэмэлт цэсэнд улсын төсвөөс энэ онд санхүүжих хөрөнгө оруулалтын төсөл, арга хэмжээ, барилга байгууламжийн жагсаалтыг татаж авахаар оруулсан нь сайшаалтай.
Мөн Гар утасны аппликейшн – Public Investment мобайл апп-ыг татаж авч ашиглавал илүү мэдээлэл, хавьгүй олон ангилалтай. Мөн хиймэл оюун ухаан ашиглах цэсийг туршилтаар нэвтрүүлсэн, одоогоор “түүхий” байна.
Төсвийн хөрөнгө оруулалтын удирдлагын цахим систем (PIMIS)
Public Investment Management Information System
Энэ бол дээрх цахим сайтын олон нийтэд хаалттай хэсэг бөгөөд зөвхөн нууц үгээр нэвтрэх боломжтой.
| Бид publicinvestment.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Монгол Улсын Засгийн газрын гадаад зээл, тусламжийн удирдлагын мэдээллийн систем (ODAMIS)
(Official Development Assistance Management Information System)
Энэ бол хаалттай систем, гэхдээ олон нийтэд зориулсан нээлттэй хэсэгт олон нийтийн эрхээр нэвтэрч Монгол Улсад хэрэгжиж байгаа олон улсын байгууллагын болон гадаад орнуудын зээл тусламжийн үйл явцын янз бүрийн мэдээллийг олж авах боломжтой. 2025 оны 2-р сарын байдлаар “Санхүүжилтын хүсэлт” цэсэнд 1828 төсөл, хөтөлбөрийн мэдээлэл, “Төсөл, арга хэмжээ” цэсэнд 438 төсөл, хөтөлбөрийн мэдээллийг байршуулсан байна. Ихэнхдээ ерөнхий, танилцуулгаас хэтрээгүй, үйл явц, үр дүнгийн мэдээлэл алдаг оног, гэхдээ нэгбүрчлэн судалбал Монгол Улсад олон жил хэрэгжээд дууссан, эсвэл үргэлжлэн хэрэгжиж байгаа анхаарал татахуйц, бас санаанд оромгүй гэж хэлж болох төсөл хөтөлбөрүүдийн талаар бага сага мэдэж авч болно.
Жишээлбэл, бидний сайн мэдэх Улаанбаатар-Дархан чиглэлийн авто замтай холбоотой хоёр төслийн мэдээлэл энд байна. Хоёулаа Европын сэргээн босголт, хөгжлийн банкны санхүүжилттэй бөгөөд нэг нь 50766/11282/75122 дугаартай “Улаанбаатар-Дархан чиглэлийн авто замын өргөтгөлийн төсөл”, нөгөө нь 50766 дугаартай “Улаанбаатар-Дарханы замд нэмэлт 2 эгнээ зам барих төсөл” юм. Эхнийх нь 499,178.00 еврогийн төсөвтэй гэрээ байгуулсан, хоёрдах нь 126 саяас 200 сая америк долларын төсөвтэй гэх мэтээр мэдэж авна. Харин төслийн явц, тэр тусмаа үр дүнгийн мэдээллийг огт оруулаагүй байна. Дарханы замын нөгөө том санхүүжүүлэгч нь Азийн хөгжлийн банк, гэтэл энэ тухай ямар нэгэн мэдээлэл хайлтаар гарч ирээгүй болно.
| Бид odamis.mof.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Нээлттэй өгөгдлийн нэгдсэн портал
Монгол Улсад олон жилийн хэрэгжсэн Дэлхийн банкны “Ухаалаг засаг” төслийн нэг чухал үр болж байгуулагдсан сайт бөгөөд “Төрийн өгөгдлийг иргэдэд нээлттэйгээр ашиглуулах зорилготой” гэж танилцуулсан байна.
Харин 2025 оны 2-р сарын байдлаар төрийн 53 байгууллагын өгөгдлийг байршуулсан нь ихэнхдээ тухай байгууллагын үйл ажиллагаатай холбоотой бүртгэл, статистикийн дүн мэдээлэл зонхилжээ. Нүүр хуудсанд байдаг хайлтын цэснээс “төсөв” гэсэн үгээр хайж үзвэл тухайн байгууллагуудын татан төвлөрүүлсэн орлого гэх мэт голдуу судлаачдад хэрэгтэй байж болох 7 файл оржээ.
| Бид opendata.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Төрийн худалдан авах ажиллагааны цахим систем
Энэ бол 2011 оноос төрийн худалдан авах ажиллагааны үндсэн цахим платформ юм. “Төрийн ба орон нутгийн өмчийн хөрөнгөөр бараа, ажил, үйлчилгаа худалдан авах тухай хуулиар энэ сайтыг үйл ажиллагааг зохицуулдаг учраас Монгол Улсын хэмжээнд төсвийн мөнгөөр болон зээл тусламжаар хэрэгжүүлж байгаа худалдан авалтын тендер тус бүрийн үйл явцыг сонгон шалгаруулалт зарлахаас эхлээд дүгнэж гэрээ байгуулах хүртэлх үйл явцын шат дамжлагыг нэгбүрчлэн мэдээллдэг, ингэснээр баталгааждаг албан ёсны эх сурвалж юм.
2025 оноос шинэчлэгдсэн хувилбар ажиллаж эхэлсэн бөгөөд одоогоор өмнөа хувилбартайгаа зэрэгцэн ажиллаж байна. Харьцуулахад , өмнөх нь илүү их мэдээлэлтэй, илүү цэгцтэй байсан гэж бид үзэж байна. Урьд нь тендер шалгаруулалтын зарлал төсвийн захирагчаар, оноор, төсөвт өртгөөр гэхчлэн хайж олдог, дагалдах баримт бичгүүд, ТЭЗҮ зэргийг хавсаргадаг, мөн шалгаруулалтын үр дүн, байгуулсан гэрээ зэрэг цэсүүдтэй (гэхдээ төгс биш, баримт бичгүүдийг орхигдуулах, үр дүнг хоосон орхих нь цөөнгүй байсан), өөрөөр хэлбэл үйл явцыг тасралтгүй хянах боломжтой байсан юм. Гэтэл шинэ хувилбарт эдгээр цэсүүд байхгүй буюу салж эмх цэгц алдагдсан байна. Ийм учраас шинэ хувилбар бүрэн болтол хуучин хувилбарыг ашиглахыг зөвлөж байгаа юм.
Үүний зэрэгцээ урьд жилүүдийн тендерийн мэдээллийг Интернэтээр хайхад зарим тохиолдолд tender.gov.mn сайтаас биш өөр хоёр хаягаас гарч ирэх нь бий. Тэдгээр нь хуучирсан боловч судалгаа болон эрэн сурвалжлагын сэжүүр болох нь бий. Үүнд,
Төрийн худалдан авах ажиллагааны газар -spa.gov.mn (Зарим нэг хуучин тендерийн урилга, үр дүн)
Төрийн өмчийн бодлого, зохицуулалтын газар – pcsp.gov.mn (Дуудлага худалдаа гэх мэт)
| Бид tender.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Орон нутгийн хөгжлийн сангийн цахим сайт
2013 онд Төсвийн тухай хуулиар бий болгосон Орон нутгийн хөгжлийн санг ил тод, нээлттэй болгох зорилготой, 2018 онд шинэчлэгдсэн цахим сайт юм. Улсын төсвөөр Орон нутгийн нэгдсэн сангийн хэмжээг тогтоож эхлээд аймаг, нийслэл, дараа нь сум, дүүрэг, баг, хороонд шат дараалан хуваарилж тухайн орон нутгийн иргэдэд хэрэгцээтэй орон байрны засвар, орчны тохижилт, заримдаа бүхэл бүтэн барилга байгууламж гэх мэтээр юунд зарцуулахыг өөрсдөөр хэлэлцүүлж шийдвэрлэдэг. 2021 оноос эхлэн Ашигт малтмалын нөөц ашигласны татварын 10 хувийг ОНХС-д хуваарилдаг болсон уул уурхайтай сум орны хувьд энэ сангийн ач холбогдлыг нэмэгдүүлжээ. Энэ сайтад өнгөрсөн жилүүдийн ОНХС-ын хөрөнгө оруулалтын зар мэдээлэл, статистик дүнгээс гадна холбогдох хууль журам, дүрэм, танилцуулга, сурталчилгаа, сургалтын материал, хичээл, мөн Дэлхийн банк ба Швейцарийн хамтын ажиллагааны нийгэмлэгийн санхүүжилтээр хэрэгжүүлсэн “Тогтвортой амьжиргаа” төслийн мэдээллийг байршуулж ирсэн боловч 2023 оны намраас хойш мэдээллээ шинэчлээгүй, зогсонги байна. Энэ нь дараачийн сайттай холбоотой болов уу.
| Бид tusuv-oronnutag.mof.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Орон нутгийн хөгжлийн сангийн цахим сайт
Орон нутгийн хөгжлийн сангийн цахим сайтын 2024 оны шинэ, боловсронгуй хувилбар юм. Цэсүүдээс үзэхээд 2018 оноос хойшхи мэдээллийг нөхөж оруулаад зогсохгүй 2030 оныг дуустал үргэлжлүүлэхээр тооцоолжээ. Харин одоогоор мэдээлэл багатай буюу ерөнхий статистик мэдээлэл зонхилж байна. Шинэ юм гэвэл ОНХС-ийн аппликэйшнийг нэвтрүүлсэн ба түүнийг гарт утсандаа суулгаж тус сангийн эх үүсвэрээр хэрэгжүүлэх ажилд баг, хорооны Засаг даргын нэр дээр санал гаргаж болно. Мөн энэ зорилгоор сайтын тусгай хуудсыг ашиглах, ингэхдээ танилт, нэвтрэлтийн ДАН системээр нэвтрэхээр тохируулсан байна.
Энэ сайт иргэдийн саналыг янз бүрийн сувгаар авах зориулалттай хэрнээ санал өгч буй тухайн иргэний аж төрдөг аймаг, нийслэл, сум дүүрэг, баг хорооны орон нутгийн хөгжлийн сангийн төсөв, хөрөнгө оруулалтын талаар тодорхой мэдээлэл авах боломж үгүйлэгдэж байгаа болно.
| Бид onhs.mof.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Засгийн газрын Шилэн ажилагааны цахим сайт
2023 онд Монгол Улсын Засгийн газраас санаачилсан Авлигатай тэмцэх таван Ш (шүгэл, шүүр, шувуу, шилжүүлэн авах, шил)-ын нэг – Шилэн ажиллагааны хүрээнд байгуулсан цахим сайт юм.
Зорилго нь Засгийн газрын яам, агентлаг, мөн нийслэлийн төрийн захиргааны байгууллагуудын онц чухал буюу авлигатай тэмцэх, иргэд, олон нийтийн зүгээс нэхэж шаарддаг мэдээллийг цуглуулж нэгтгэн байршуулах явдал юм. Ингэхдээ 2022 оноос хэрэгжиж эхэлсэн Нийтийн мэдээллийн ил тод байдлын тухай хуулийн дагуу тухайн байгууллагуудын мэдээлэл хариуцагчид энэ үүргийг ногдуулсан байна. Одоогоор энд байршсан мэдээллээс хамгийн анхаарал татахуйц, үнэ цэнэтэйг дурдвал нийслэлийн газрын мэдээллийн санд байгаа 2000-2021 он хүртэл шинээр эрх олгосон, хугацаа сунгасан, талбай, зориулалтын өөрчилсөн, эрх шилжүүлсэн нийт 23000 гаруй бүртгэлийн жагсаалт юм. Тухайн газар тус бүрийн байршил (гэхдээ зөвхөн дүүргээр, яг байршид байхгүй), талбайн хэмжээ, уг шийдвэрийг гаргасан Засаг даргын нэр, огноо гэх мэтийг багтаажээ. Харин энэ бүгдийг нийслэлийн биш, Хот байгуулалт, барилга, орон сууцжуулалтын яамны Газрын харилцаа, геодези, зураг зүйн газраас нээлттэй болгосон гэж ойлгогддог. Дараа нь 2021 оноос хойш нийслэлийн засаг даргын олгосон газрын мэдээлэл, үүний зэрэгцээ 21 аймаг, 9 дүүргийн Засаг дарга нар газар олгосон захирамжийг он цагийн дарааллаар нээлттэй болгохоор бэлтгэж байна гэж зарласан ч одоогоор хэрэгжээгүй байна. Харин Засгийн газрын ихэнх тусгай сангийн зарцуулалтын мэдээлэл, бас төрийн өмчит зарим компанийн төлөөлөн удирдах зөвлөлийн гишүүдийн нэрсийн жагсаалтыг нийтэлсэн нь талархууштай. Ашигт малтмалын тусгай зөвшөөрлийг зөвхөн хамгийн хамгийн гэсэн агуулгаар бэлтгэсэн статистик байдлаар оруулжээ. Мөн төрийн өмчийн хуулийн этгээдийн нээлттэй мэдээллийг байршуулсан тусгай цэстэй бөгөөд тэр нь soe.gov.mn гэсэн тусдаа сайт юм.
Уг сайт саяхан шинэчлэгдсэн ба “хуучин хувилбар” нь зэрэгцэн ажиллаж байна. Тэнд Богдхан уулын дархан цаазат газар болон Хөвсгөлийн байгалийн цогцолбор газарт олгосон нийт 2533 тусгай зөвшөөрлийн жагсаалт хадгалагдаж байна.
| Бид shilen.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Монгол Улсын Засгийн газар
Монгол Улсын Засгийн газрын албан ёсны цахим сайтын ээлжит хувилбар. Урьд нь байсан zasag.mn хаяг одоо шууд mongolia.gov.mn руу шилжиж байна. Энд шууд төсөв санхүүтэй холбоотой мэдээлэл байхгүй, Засгийн газар болон Ерөнхий сайдын үйл ажиллагаатай холбоотой цаг үеийн мэдээлэл зонхилдог. Цаг хугацааны хувьд 2016 оноос хойшхи мэдээллийг агуулжээ.
Сайтын доод хэсэгт төрийн захиргааны төв байгууллагууд (яам, агентлаг), мөн аймгууд, бас нийслэлийн дүүргүүдийн цахим сайтууд руу очих холбоосыг жагсаажээ. Харин төрийн өмчит болон төрийн өмчийн оролцоотой аж ахуйн нэгж, бусад байгууллагуудыг хамруулаагүй. Өөрөөр хэлбэл зөвхөн Засгийн газрын байгууллагуудаар хязгаарлагддаг.
| Бид mongolia.gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Төрийн байгууллагуудын нэгдсэн цахим хуудас
Монгол Улсын төрийн байгууллагуудын мэдээллийг нэгтгэж харуулах зорилгоор дахин энэ сайтыг байгуулжээ. Үүнд Ерөнхий сайд, Шадар сайд , яам, агентлаг, төсөвт байгууллага, төрийн өмчит ба төрийн өмчийн оролцоотой компани, албад, хамгаалалтын захиргаа, бүр театр, музейнүүдийг хүртэл хамааруулсан. Эдгээр байгууллага тус бүрт зориулсан хуудастай бөгөөд тэдгээрт холбогдолтой танилцуулга, янз бүрийн баримт материалуудын ижил загвартай ангиллаар байршуулж эхэлсэн байна. Мэдээж тэнд байгаа холбоосуудаар дамжин албан ёсны сайтууд руу нь орох боломжтой. Орон нутаг, түүний дотор нйислэл Улаанбаатар хотын янз бүрийн байгууллагад зориулсан хуудсуудыг ч мөн дээрх зарчмаар нээсэн байна. Хэрвээ тэр бүгд цэсүүдээр орж сайтар “нэгжвээс” төсөв, санхүүгийн тодорхой хэмжээний мэдээллийг олж болно.
Үүний зэрэгцээ төрийн үйлчилгээ авах платформууд руу нэвтрэх холбоосуудыг байршуулжээ.
| Бид gov.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Үндэсний аудитын газрын сайт
Улс орон нутгийн төсвийн зарцуулалт, хөрөнгө оруулалт, зээл тусламжийн хэрэгжилт, үр дүнд хийсэн албан ёсны аудитын тайланг нийтэлдэг учраас судлаач, сэтгүүлч, иргэний нийгмийн байгуулагуудын хувьд маш чухал эх сурвалж болдог сайт юм. Хамгийн хэрэгцээтэй нь “Аудитын тайлан”- гэсэн хэсэг, тэр дундаас гүйцэтгэлийн аудит, тэдгээрийн дэлгэрэнгүй тайлангууд юм. Энд ҮАГ-ын төдийгүй түүний харъяа аймгуудын аудитын газрын тайлангуудыг огноогоор жагсаан оруулдаг болсон байна.
| Бид audit.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Эрх зүйн мэдээллийн нэгдсэн систем
Монгол Улсын Үндсэн хуулиас эхлээд Ерөнхийлөгчийн зарлиг, хуулиуд, тогтоол, тушаал, захирамж шийдвэр гээд эрх зүйн бүх баримт бичгүүд, тэдгээрийн дотор УИХ-аас баталсан Монгол Улсын төсвийн баримт бичгийг хавсралтуудын хамт хамгийн түрүүнд нийтэлдэг, баталгаатай эх сурвалж юм. 2025 оны төсвийн бүрэн эхээр нь зөвхөн эндээс татаж авч болно.
| Бид legalinfo.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Яам, агентлаг, төсвийн байгууллага, төрийн өмчит болон төрийн өмчит компаниуд, төсвийн байгууллагуудын цахим хуудсууд
| Бид эдгээр сайтуудын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Нийслэлийн Иргэдийн төлөөлөгчдийн хурлын цахим сайт
Энэ сайт нийслэлийн ulaanbaatar.mn портал сайтын нэг хэсэг боловч тусдаа бүтэц, цэс бүхий бие даасан сайтын зарчмаар үйл ажиллагаа явуулдаг. Урьд нь Монгол Улсын иргэдийн төлөөлөгчдийн хурлын нэгдсэн цахим хуудас – khural.mn (бас hural.mn нэрээр нэвтэрч болдог байсан)-ны бүтцэд багтдаг, , мөн citycouncil.mn домэйн нэртэй сайт байсан бол одоо ийм болжээ.
Агуулгын хувьд ИТХ-ын өдөр тутмын үйл ажиллагаатай холбоотой янз бүрийн мэдээ, мэдээлэл танилцуулга нийтлэгддэг. Энд Нийслэлийн ИТХ-ын тогтоол, Тэргүүлэгчдийн тогтоол (2020 оноос өмнөх), бас нийтээр дагаж мөрдөх журам зэрэг бусад шийдвэрүүдийг огноогоор жагсаан нийтэлдэг. Гэхдээ тогтоолуудыг дугаараар нягтлахад заримыг алгассан, бас хавсралтыг оруулахгүй байна. “Иргэний оролцоо” гэсэн дамжуулан цэсээр нийслэлийн дүрэм журамд санал авч, “Ил тод байдал” цэсэнд зарим нэг ажил гүйцэтгэх, судалгаа хийх, зөвлөлд сонгон шалгаруулалтын (төсвийн биш) зар нийтлэгдэж байна.
| Бид khural.ulaanbaatar.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Улаанбаатар хот
Монгол Улсын нийслэл Улаанбаатар хотын төр, захиргааны албан ёсны төв цахим сайт юм. Маш их мэдээлэлтэй учраас иж бүрэн портал сайт гэж нэрлэж болно.
Хотын төр захиргааны байгууллагууд, юуны өмнө, Засаг дарга, тэдгээрийн орлогчдын оролцоотой болон харъяа байгууллагуудын өдөр тутмын ажил, арга хэмжээ, үйл явдлуудыг мэдээ, ярилцлага, подкаст, фото сурвалжлага, live гэх мэт сэтгүүл зүйн төрлүүдээр ангилан мэдээлдэг, энэ утгаараа бараг хэвлэл мэдээллийн хэрэгслийн үүргийг гүйцэтгэж байна. Агуулгын хувьд танилцуулга, сурталчилгаа зонхилно.
Нийслэлийн ил тод, нээлттэй байдлыг хангахад “Захирамж, шийдвэр” цэсэнд огноогоор байршуулдаг нийслэлийн Засаг даргын захирамж маш чухал юм. Нийслэлд төсвийн томоохон хөрөнгө оруулалт, зарцуулалт, албан тушаалын томилгоо, ялангуяа газар, барилга байгууламжийн зөвшөөрөл олгохтой холбоотой шийдвэрийг зөвхөн нийслэлийн Засаг дарга гаргадаг учраас эдгээр захирамжууд нь иргэд, олон нийтийн хувьд Улаанбаатар хотын асуудлуудын талаар мэдэх эрхээ хангах, хяналт тавих, улмаар үйл явцад оролцох нөхцлийг бүрдүүлэх учиртай. Бас сэтгүүлчдийн хувьд мэдээллийн эх сурвалж юм. Энд нийслэлийн Засаг даргын захирамжийг 2010 оноос байршуулж эхэлсэн ба өнгөрсөн жил 1400 гаруй захирамж гаргасныг дундаж гэж үзвэл өнгөрсөн 15 жилд 20 мянга орчим захирамж гарсан байх учиртай. Гэтэл одоогийн байдлаар нийтдээ 10 мянган захирамжийг байршуулсныг үзэхэд тэн хагасыг оруулалгүй, алгассан гэсэн үг юм. Мөн 2021 оноос өмнө байршуулсан захирамжуудын дугаарыг яагаад ч юм хассан, маш олон захирамжийг Ажлын хэсэг байгуулах тухай гэхчлэн ерөнхий нэрлэсэн учраас агуулгыг хайлтаар гаргаж ирэх боломжгүй, бас хамгийн чухал үндсэн мэдээлэл агуулдаг хавсралтуудыг хавсаргахгүй байна.
Нийслэлийн долоо хоног тутмын шуурхай зөвлөгөөний өгсөн үүрэг даалгаврыг нийтэлдэг нь дотоод ажлын буюу аж ахуйн шинжтэй учраас ач холбогдол багатай гэж үзнэ. Харин “Шилэн данс” нэртэй цэсний “Нийслэлийн төсвийн мэдээлэл” дэд цэсэнд Улаанбаатар хотын батлагдсан, нэмэлт өөрчлөлт оруулсан төсөв буюу Нийслэлийн ИТХ-аар баталсан тогтоолыг бүрэн эхээр нийтэлдэг, үүгээрээ khural.ulaanbaatar.mn сайтаас ч давуу юм. Мөн “Төсөл, хөтөлбөр” дэд цэснээс Засаг даргын мөрийн хөтөлбөр, хөгжлийн төлөвлөгөө зэрэг баримт бичгүүдийг үзэх боломжтой.
Цоо шинэ зүйл гэвэл ноднингоос Нийслэлийн бондын мэдээллийг холбоос хэлбэрээр байршуулж танилцуулдаг болжээ.
“Харъяа байгууллагууд” цэсэнд нийслэлийн харъяа агентлаг, Захирагчийн ажлын албаны харъяа нэгжүүд, орон нутгийн өмчит болон төсвийн байгууллагууд, мөн дүүргийн цахим сайтууд руу нэвтрэх холбоосыг ангилж жагсаасан байна.
| Бид ulaanbaatar.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Улаанбаатар хотын ЗДТГ
Нийслэлийн Засаг даргын тамгын газрын албан ёсны сайт юм. Ulaanbaatar.mn сайтын нэг хэсэг боловч бие даасан сайтын хэмжээний бүтэцтэй болно.
Агуулгын хувьд ulaanbaatar.mn сайттай зарим талаар давхардсан, тухайлбал, нийслэлийн Засаг даргын захирамжуудыг, гэхдээ нөгөө л алгасдаг байдлаар болон дугааргүй хэвээр байршуулжээ. Нэмээд Засаг даргын тамгын газрын даргын тушаалыг оруулдаг цэстэй ч 2021 оноос хойш ердөө 24-ыг нийтэлжээ. Төсөв, санхүү, мөнгө төгрөг зарцуулахтай холбоотой тушаал огт байхгүй.
Нийслэлийн төр захиргааны байгууллагуудаас үзүүлдэг төрийн үйлчилгээ авахтай холбоотой цэс, холбоосууд бий.
| Бид zdtg.ulaanbaatar.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Улаанбаатар хотын худалдан авах ажиллагааны газар
Өнөөдөр Монгол Улсын төсөв, түүний дотор Улаанбаатар хотын төсвийн хөрөнгөөр бараа, ажил үйлчилгээ худалдан авах бүх тендер шалгаруулалтын мэдээлэл tender.gov.mn нэгдсэн сайтад нийтлэгдсэн болсон учраас энд байгууллагын дотоод үйл ажиллагаа зонхилжээ. Олзуурхууштай нь нийслэлийн худалдан авах ажиллагааны 2025 оны төлөвлөгөө, мөн 2024 оны төлөвлөгөөг ч нэмэлт өөрчлөлт оруулсан байдлаар тухай бүр байршуулсан байна.
| Бид ub-procurement.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Улаанбаатар хотын бонд
| Бид ubbond.bdsec.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
Нийслэлийн эрх зүйн мэдээллийн нэгдсэн сан
ublegal.mn (ublegal.ulaanbaatar.mn)
Энэ бол Нийслэлийн Иргэдийн төлөөлөгчдийн хурлын тогтоол, Засаг даргын захирамж, Засаг даргын тамгын газрын даргын тушаал, Захирагчийн ажлын албаны даргын тушаал болон Засаг даргын хэрэгжүүлэгч агентлагууд, нийслэлийн өмчит төсөвт байгууллага, аж ахуйн тооцоот газрууд, нэмээд нийслэлийн есөн дүүргийн шийдвэр (чухам ямар шийдвэр болох нь тодорхойгүй) гэсэн цэсүүдтэй, энэ бүгдээс огноо, дугаар, товч агуулга зэрэг нэлээд дэлгэрэнгүй үзүүлэлтээр хайж олох боломжтой сайт юм. Харамсалтай нь ихэнх цэс сүүлийн хэдэн жил шинэчлэгдээгүйгээс гадна хамгийн чухал мэдээллийг агуулсан хавсралтыг татаж авах боломжгүй байна. Нэлээд цаг хугацаа зарцуулж хүчин чармайлт гаргавал хэдий хуучирсан ч гэсэн зарим мэдээллийг олж авах боломжтой.
Энэ сайтыг анх 2015 оны үед Азийн сангийн төслийн хүрээнд байгуулж ublegal.mn домэйн нэртэй тусдаа сайт байсан ба саяхнаас ulaanbaatar.mb сайтын нэг хэсэг болсон юм.
| Бид ublegal.ulaanbaatar.mn сайтын өнөөгийн байдал, бүтэц, мэдээллийн бүрэн байдал, агуулга зэрэгт байнга мониторинг хийж, түүнийг хэрхэн үр дүнтэй ашиглах талаар зөвлөмж гаргахын зэрэгцээ хэрхэн сайжруулах талаар санал дэвшүүлж ажилладаг. Энэ тухай хуудсанд зочилно уу |
УЛС, ОРОН НУТГИЙН ТӨСВИЙН ЗАРЦУУЛАЛТ, ХӨРӨНГӨ ОРУУЛАЛТ, ГАДААДЫН ЗЭЭЛ ТУСЛАМЖИЙН ТӨСӨЛ, ХӨТӨЛБӨРИЙН МОНИТОРИНГ 